Ti e msove trëndafilë
Të çelet, të lulëzohet,
Të qeshnj’e të zbukurohet,
Ta përvëlonjë bilbilë,
E ta bënjë të pëlcasë,
Një fjalë të mos i flasë;
Dhe nga kjo t’i vinjë mirë,
Të zbukurohet më shumë,
E të mos ketë mëshirë,
Po ta lerë edhe pa gjumë.
Naim Frashëri
Njëmend erth behari
Mjeri unë hallëshumi,
S’u ndashë kurrë së qari
Dertet e mia si kumi.
Nezim Frakulla (1680 – 1760)
Nëse ma çel derën, më ke mysafirin tand:
E nëse jo, prapë më ke robin tand të kthyem mbrapa!
S’duhet të bahem merak se a më çel derën a jo:
Qyshdo t’bahet, puna jeme asht, me kân
Me mend e zemër gjithnji tek Ti!
Shqipëroi: © Pupëza
Nata, e shkretë,
Qysh nga malet gjer në det.
Por unë, që të përkund ty,
Nuk jam vetëm!
Qielli, i shkretë
Kur hëna bie në det.
Por unë, që të mbaj ty,
Nuk jam vetëm!
Tërë bota, e shkretë,
Çdo gjë tretur në pikëllim.
Por unë, që të mbaj në përqafim,
Nuk jam vetëm!
Shqipëroi: © Pupëza
Tirana jonë si mësoi
fort e zuni insiqari
kush e hypi e teproi
nuk pat frikë nga Xhebbari.
Po pate pare je njeri
tjetërsoj të zë bulluri
fukarenjtë i kanë bezdi
veç kërbaç kallankusuri.
Zenel Bastari, Tiranë
Njeriu qenka thelb’ i Gjithësisë,
Dhe drit` e syrit t’madh të Perëndisë:
Qarku i Qenies qënka si Unazë
Me vul xhevair’ i Njerëzisë!
Omar Kajam – Rubairat
Shqipëroi: Fan Noli
Jo, mos i bjer shkelm të voglës,
Posa të madhen rrugës ndesh!
Kur të duhet një gjilpërë,
Nga sopata ç’dobi do kesh?
Rahim Khankhana
Shqipëroi: Pupëza
Prej kah gjithë kjo nguti?
Kudo të shkosh,
Sonte
Do shohësh
Të njejtën hanë!
Izumi Shikibu
Piktura: Hana e plotë teksa barin e lëmon era – Utagawa Hiroshige
Shqipëroi: © Pupëza
Ta kisha pasë shtrojën e qëndisun të qîllnave,
Shkruem me dukat e argjend të ndritun,
Me të kaltrën e të zbehtën e t’errtën
Pelhurë të natës e dritës e gjysmë dritës,
I kisha shtrue ‘tana nën kambët tua:
Ama unë, fakir, veç andrra kam, kurgja tjetër;
E i kam shtrue ato nën kambët tua;
Ngadal’ tek e lshon hapin, se, mbi andrrat e mia je tuj’ shkel.
William Butler Yeats
Shqipëroi: © Pupëza
